Fjölskyldan í Canterbury

Loksins loksins blogg gott fólk! Það eru eflaust margir sem bíða spenntir eftir að heyra frá okkur hvernig hefur gengið í þetta sinn hjá okkur í Canterbury. Við höfum haft nóg að gera við að koma okkur fyrir. Fyrir þá sem ekki vita að þá er Venni bróðir hennar Ingibjargar fluttur hingað til Canterbury ásamt fjölskyldu (Hjónin ásamt 3 börnum, tveir strákar 11 og 13 ára, og ein 5 ára stelpa). Þau ákváðu að prufa England í 1 ár. Við höfum notið góðs af veru þeirra hér því við vorum íbúðarlaus þegar við komum hingað þann 1. sept. Við áttum heima inni á þeim á meðan við vorum að redda okkur íbúð til að leigja. Okkur tókst að redda íbúð mjög nálægt þeim eins og við vildum. Það er rosalega gott að hafa hluta af fjölskyldunni í næsta nágrenni :o)

...halda áfram hér...

Við fluttum inn í okkar íbúð 12. sept. Hún er alveg ný og við erum þau fyrstu sem eiga heima í henni. Áin (River Stour) rennur á milli okkar og Venna. Við erum staðsett á eyju þar sem gömul milla (Barton Mill) stóð eitt sinn. Íbúðin er á annari hæð í fjölbýli og eins og áður sagði alveg ný. Við erum mjög ánægð með hana þar sem að hún er björt og rúmgóð. Engin húsgögn fylgdu íbúðinni þannig að IKEA er búið að vera okkar annað heimili þessa dagana. Við erum búin að húsgagna okkur upp og koma okkur ágætlega fyrir. Íbúðin var öll teppalögð en við tókum okkur til og keyptum plastparket í B&Q og skelltum því ofaná teppið í stærsta rýminu. Það kemur ótrúlega vel út og kostaði álíka mikið og að kaupa góða mottu undir eldhúsborðið. Það koma myndir af íbúðinni seinna.

Þar sem að við þurftum að keyra oft í IKEA (næsta búð er í útjöðrum London sem er u.þ.b. klukkutíma keyrsla) þurftum við að sjálfsögðu að kaupa okkur bíl. Við duttum niður á glæsilega drossíu fyrir góðan pening: Ford Mondeo 1998, sjálfskiptur og mikið keyrður (148000 mílur) og pínulítið beyglaður. Einungis 450 pund. Við vonumst til að hann endist okkur í þessi 2 ár án mikils viðhalds en síðan getum við hent honum með góðri samvisku.

Við erum ekki komin með almennilega tengingu við netið eins og er og er það afsökun fyrir lélegheitum í bloggstarfssemi. Ég byrjaði í skólanum 10. sept og hefur það gengið vel hingað til. Það má segja að ég sé í upprifjun þessa fyrstu vikur þar sem að sumir aðrir í þessu masters prógrammi eru ekki með bakgrunn í forritun. Það er verið að koma öllum á sömu blaðsíðu. Fyrir þá sem skilja að þá er ég alfarið að forrita í java og er verkefnið fyrir fyrsta kúrsinn meðal annars að skrifa leik í anda "World of Zuul".

Eftir að hafa rætt við nokkra samnemendur hef ég komist að því að ég ræðst ekki á garðinn þar sem hann er lægstur. Tölvudeildin í University of Kent er í 10 sæti yfir virtustu tölvudeildir háskólanna í Englandi sem eru um 100 talsins. Línan sem ég er á (Distributed Systems and Networks) er einnig talin vera frekar strembin. Það verður sem sagt fjör hjá mér í vetur.

Skólinn hjá Ingibjörgu byrjaði 17. sept og hefur farið af stað með látum. Það hrúgast inn endalaus verkefni og álagið er töluvert meira heldur en á síðusta ári. Það lítur út fyrir strembinn vetur hjá henni.

Bryndís er byrjuð á fullu í gamla leikskólanum sínum og er orðin hæst ánægð með það. Hún talar ekki mikla ensku en það er allt að koma hjá henni. Hún var svolítið feimin fyrstu dagana en núna er hún orðin "same good old Bryndís" eins og fóstrurnar segja. Bryndís er hæstánægð með að hafa Kötlu Vigdísi nálægt sér, en þær leika sér mikið saman. Katla er sömuleiðis ánægð með að hafa Bryndísi í nágrenninu.

Ég læt þetta nægja í bili en ég tók nokkrar myndir með nýja símanum mínum sem ég setti í myndaalbúmið. Gæðin eru ekki upp á marga fiska en þetta er betra en ekkert. Það er ágætt að smella á myndirnar, þá opnast þær í nýjum glugga í fullri stærð. Ég setti inn heimilisfangið ásamt síma efst í hægra hornið, í kynninguna á blogginu.

http://www.bjarki.net/gallery/thumbnails.php?album=23