Fjölskyldan í Canterbury

Nú erum við Ingibjörg búin að fá niðurstöður úr prófunum/krítikinni. Þetta gekk ágætlega hjá okkur alltsaman. Það er mikill léttir að vera búin að fá niðurstöður og Ingibjörg er þá komin á næsta skref í sínu námi; innanhússarkítektúr. Ég er búinn að komast yfir erfiðasta hjallann en þessir 2 kúrsar eru taldir vera erfiðasti hluti námsins en næst verða próf hjá mér í byrjun maí. Eftir það tekur síðan lokaverkefnið við. Ég hef heyrt í tveimur meðstúdentum mínum, annar féll í báðum og hinn féll í öðru þannig að ég prísa mig sælan. Ég fékk lokaverkefnið sem ég vildi fá. Þar vóg reynslan þungt. Það gengur út á að bæta við netvirkni við forritunarumhverfi sem hjálpar krökkum að læra að forrita. Forritunarumhverfið heitir greenfoot. Þetta gæti orðið áhugavert verkefni.

...halda áfram hér...

Bryndís er alltaf að stækka. Henni finnst skemmtilegast að leika við Kötlu. Henni finnst líka rosalega skemmtilegt að hlusta og hoppa. Ég útbjó disk með barnalögum fyrir hana sem er á repeat í botni allan daginn og hún hoppar og skoppar í rúminu sínu í takt við músikina. Við erum komin með ógeð af músikinni, maður vaknar með "Gott CD drive, góður harður diskur, án þess er ég, hvorki fugl né fiskur" (úr latabæ) á heilanum á morgnanna og sofnar með það á heilanum á kvöldin. Píla Pína er líka mjög vinsæl. Mér sýnist hún vera með heilmikla músik í sér.

Hún er farin að spyrja erfiðra spurninga. Í gærkvöldi spurði hún: "pabbi, afhverju eru konur ekki með skegg?". Ég þurfi að hugsa mig um og sagði "það er vegna þess að í eld gamladaga þá voru mennirnir alltaf úti í kuldanum að veiða í matinn, þá þurftu þeir að láta sér vaxa skegg svo þeim yrði ekki kalt í framan. En konurnar voru inni á meðan að hugsa um heimilið". Hún lét sér lynda þessa útskýringu. Síðan spurði hún mömmu sína: "mamma afhverju heiti ég Bryndís?". Og Ingibjörg svaraði: "það er af því að mömmu og pabba þótti Bryndís svo fallegt nafn". Þá knúsaði Bryndís mömmu sína mikið og vel og þakkaði henni vel fyrir nafnið. Við erum ánægð með að hún kann vel við nafnið sitt :0)

Við ákváðum í samráði við Venna og Svövu að skella okkur á skíði 5 - 12 apríl. Við erum búin að panta okkur fjallakofa í Sviss. Við hlökkum mikið til að skella okkur. Svæðið heitir Thyon (opna skrána með Google Earth).

Í dag var mjög gott veður þannig að við ákváðum að skella okkur í fish and chips. Við skruppum niður í Saint Margrets Bay sem er skemmtilegur staður við hvítu klettana við suður austur strönd Kent skagans, rétt hjá Dover. Þar fengum við mjög fínan fisk og við gátum spókað okkur niðri á ströndinni í sólinni. Hafið það gott á íslandi í snjónum. Mamma, þú prentar þetta kannski út fyrir ömmu og afa.

Kveðja,
- Bjarki, Ingibjörg og Bryndís